മൂന്നാമത് ലേബർ സ്പോർട്സ് ടൂർണമെൻറിന് ഷാർജയിൽ തുടക്കമായി..

 

ഷാർജ ഗവൺമെൻറിന് കീഴിലുള്ള ലേബർ സ്റ്റാൻേറഡ്സ് ഡെവലപ്‌മെൻറ് അതോറിറ്റി സംഘടിപ്പിക്കുന്ന മൂന്നാമത്തെ ലേബർ സ്‌പോർട്‌സ് ടൂർണമെൻറ് 2019 ഡിസംബർ 13 വെള്ളിയാഴ്ച ആരംഭിച്ചു.

ഷാർജ വിമാനത്താവളത്തിന് എതിർവശത്തുള്ള ഷാർജ നാഷണൽ പാർക്കിലെ ഷാർജ സ്പോർട്സ് കൗൺസിൽ ഗ്രൗണ്ടിൽ വെള്ളിയാഴ്ച വൈകിട്ട് നാല് മണിക്ക് ഔദ്യോഗികമായി നടന്ന ഉത്‌ഘാടനച്ചടങ്ങിൽ ഷാർജ ലേബർ സ്റ്റാൻഡേർഡ്‌സ് ഡെവലപ്മെൻറ്    അതോറിറ്റി ചെയർമാൻ സലെം യൂസഫ് അൽ ഖസീർ, ലേബർ സ്റ്റാൻഡേർഡ്‌സ് ഡെവലപ്മെൻറ് അതോറിറ്റിയിലെ സപ്പോർട്ട് ആൻഡ് കമ്മ്യൂണിക്കേഷൻ ഡിപ്പാർട്മെൻറ് ഡയറക്ടർ ഒമർ സലെം അൽ ഷാർജി, റീച്ച് ടാർഗറ്റ് സ്പോർട്സ് സർവീസസ് ഡയറക്ടർ താരിഖ് അൽ ഖബൻഷി എന്നിവർ പങ്കെടുത്തു.

ടൂർണമെൻറിൻെറ ഭാഗമായി രാവിലെ ഏഴ് മണി മുതൽ മത്സരങ്ങൾ ആരംഭിച്ചിരുന്നു. ബാസ്കറ്റ്ബോളിൽ അഞ്ചും ഫുട്ബോളിൽ ഏഴും ക്രിക്കറ്റിൽ നാലും ഹോക്കിയിൽ ഒന്നും മത്സരങ്ങളാണ് ഉൽഘാടനദിനത്തിൽ നടന്നത്.

ഷാർജ മുനിസിപ്പാലിറ്റി, ഫാൽക്കൺ പാക്ക്, ഫാസ്റ്റ് ബിൽഡിങ് കൺസ്ട്രക്ഷൻ, അഡ്‌നോക്, ഹമരിയ മുനിസിപ്പാലിറ്റി, അൽ ഫുറാത്, റീച്ച് ടാർഗറ്റ്, അറേബ്യൻ ഗൾഫ്, അൽ ഹജ്, അൽ മോമെയ്‌സ്, സ്മാർട്ട് ടെക്, ഒ.ബി.എസ്, ഇലവൻ ബ്രദേഴ്‌സ്, എമിറേറ്റ്സ് സ്റ്റീവ്ഡോറിങ്, യു.ഇ.എച്ച്.സി., ഷാർജ സ്‌ക്വാഡ്, അസ്റ്റിഗ്, മെഡ് ഫാർമ, ഡ്രാഗോൾസ്, അർമാഡോ, നെറ്റ് റിപ്പേഴ്‌സ്, എ.എഫ്.ഇ.പി.എൽ. എന്നീ ടീമുകളാണ് ആദ്യദിനത്തിലെ വിവിധമത്സരങ്ങളിൽ പങ്കെടുത്തത്.

എല്ലാ വെള്ളിയാഴ്ചയും രാവിലെ ഏഴ് മുതൽ വൈകിട്ട് അഞ്ചര വരെയാണ് മത്സരങ്ങൾ നടക്കുന്നത്. ഡിസംബർ പതിമൂന്നിന് ആരംഭിക്കുന്ന ടൂർണമെൻറ് 2020 മാർച്ച് 27 വരെ നീണ്ടുനിൽക്കും.

ക്രിക്കറ്റ്, ഹോക്കി, ബാസ്കറ്റ്ബോൾ, വോളീബോൾ, ഫുട്ബോൾ എന്നീ അഞ്ച് ഇനങ്ങളിലാണ് മത്സരങ്ങൾ നടക്കുന്നത്.

യു‌എഇയിലെ പുരുഷതൊഴിലാളികൾ ഉൾപ്പെട്ട ടീമുകളാണ് ടൂർണമെൻറിൽ പങ്കെടുക്കുന്നത്.

ടൂർണമെൻറിലെ വിജയികൾക്ക് 250, 000 ദിർഹം വിലമതിക്കുന്ന ക്യാഷ് പ്രൈസുകളും ട്രോഫികളും സമ്മാനങ്ങളും ലഭിക്കും. മത്സരിക്കുന്നവർക്കും മത്സരം വീക്ഷിക്കാനെത്തുന്നവർക്കും സമ്മാനങ്ങൾ നേടാനുള്ള അവസരവും ടൂർണമെന്റിൽ ഒരുക്കിയിട്ടുണ്ട്.

മത്സരങ്ങളിൽ പങ്കെടുക്കുന്നവർക്ക് പ്രശസ്തരായ കളിക്കാരെ കാണാനും അവരോടൊപ്പം കളിക്കാനുമുള്ള അവസരം ലഭിക്കും.

ഷാർജ ഭരണാധികാരിയും സുപ്രീം കൗൺസിൽ അംഗവുമായ ഷെയ്ഖ് ഡോ. സുൽത്താൻ ബിൻ മുഹമ്മദ് അൽ ഖാസിമിയുടെയും ഷാർജ കിരീടാവകാശിയുടെയും പ്രത്യേകമാർഗനിർദേശപ്രകാരമാണ് 2017-ൽ ലേബർ സ്പോർട്സ് ടൂർണമെൻറ് ആരംഭിച്ചത്. രാഷ്ട്രനിർമ്മാണത്തിന് വിലയേറിയ സംഭാവന നൽകുന്ന തൊഴിലാളികളുടെ കായികവിനോദങ്ങളെ പ്രോത്സാഹിപ്പിക്കുവാനും അവരെ സമൂഹത്തിൻെറ മുഖ്യധാരയിലേക്ക് കൊണ്ടുവരാനുമാണ് ലേബർ സ്പോർട്സ് ടൂർണമെൻറിന് രൂപം നൽകിയിരിക്കുന്നത്.